香港人去台灣旅行，台北一直都係好多人嘅首選。由香港出發，落機後搭捷運已經可以周圍去，朝早食早餐、下午行景點、夜晚食夜市，一日排幾個行程都唔難。不過台北好去處實在太多，一起睇睇 8 個必去景點同實用攻略！

 

第一次去台北，好多人都會先將台北101、夜市、故宮呢啲熱門地方加落行程，但真正開始排先發現，原來幾日時間未必夠去晒。今次就揀咗 8 個香港人去台北比較值得留意嘅好去處，有經典地標，亦有適合慢慢行嘅老街同近郊景點，睇完可以按自己鍾意嘅玩法去排。

 

台北好去處2026：香港人出發前要知道的 3 件事

悠遊卡怎麼買最方便

台北捷運由 2026 年 7 月 1 日起全線閘門開放信用卡同手機感應，Visa、Mastercard、JCB、 Apple Pay、Google Pay 同 Samsung Pay 都用得，唔使特登排隊買悠遊卡。

 

要留意嘅係，信用卡感應每程都以單程票價計，冇捷運常客優惠，亦冇捷運轉公車嘅轉乘折扣。所以如果日日搭好多程，悠遊卡（EasyCard）仍然係較方便嘅選擇。悠遊卡可以喺捷運站嘅售票機、服務處同指定便利店購買，便利店亦可以直接增值，用法就好似香港八達通。悠遊卡唔只可以搭台北捷運，亦可以用喺台北市公車、部分台灣鐵路路線、貓空纜車同 YouBike 等交通服務。部分便利店、餐飲店同零售店亦接受悠遊卡付款，所以去台北玩幾日，放一張喺銀包入面會幾方便。

 

增值方面，可以喺捷運站嘅加值機、服務處，以及指定便利店處理。第一次買卡時，可以按行程先加一個基本金額，用幾日再睇餘額決定要唔要再加，唔需要一開始入太多錢。

 

台北消費水平比香港低

對香港人來講，早餐店、夜市小食、台式飲品同日常交通，選擇比較多，預算彈性亦大。好似食早餐，蛋餅、飯糰、豆漿呢類台式早餐，幾十蚊台幣已經可以食到；夜晚去夜市，又可以自己揀想食幾款，唔一定要一次過食一大餐。

 

不過，唔好將「台北消費較低」理解成所有嘢都平。酒店、熱門餐廳、咖啡店、購物同景點門票，價錢可以差幾遠。尤其近年台北旅遊需求增加，住宿價格會按地點、週末、假期同大型活動有所變化。

 

出發前先查台北天氣

台北濕氣重，天氣轉得快。5 至 9 月下晝好易突然行雷閃電落大雨，7 至 9 月仲要留意颱風；12 月至 2 月東北季風帶嚟連續毛毛雨，體感比香港冬天凍。特別係例如台北101、象山、陽明山都比較受天氣影響。朝早睇到天氣唔錯，可以先安排戶外行程；遇上落雨，就將室內行程調前。

 

8個香港人必去的台北好去處

台北101與象山步道：香港人必訪地標怎麼玩最划算

第一次去台北，台北101幾乎一定會排入行程，但究竟要唔要花錢上觀景台？其實可以睇你想要咩體驗。台北101觀景台成人票目前為 NT$600，可以由高處 360 度睇台北市景；如果主要想影台北101，唔一定要買票，去象山反而可以由另一個角度睇返成座 101。

 

象山由捷運象山站出發，步道全長約 1,450 公尺，沿途有攝手平台、攝影平台同六巨石等觀景位置。平時有行山習慣嘅話，象山未必算難，但沿途有石級同斜坡，大概 30 分鐘上到觀景平台。想影靚相，可以揀下午接近日落時段上山，先影日間城市景，天黑後再影台北 101 亮燈。

台北101與象山步道係香港人必去的台北好去處，由象上行上去仲可以影到完整既 101 大樓。

(圖片來源) 

 

故宮博物院：香港人常去卻最容易安排錯順序

台北故宮博物院值得預留大半日，第一次去可以預 3–4 小時，慢慢睇翠玉白菜、肉形石等人氣館藏，再留時間行至善園。故宮主要係室內展覽，朝早入館參觀，睇完之後再去至善園散步，路線會比較順暢。至善園就在故宮旁邊，以宋代園林為設計概念，園內有水池、亭台同庭園景色，可以當成睇展覽後嘅休息時間。

講到台北好去處，一定要數到故宮博物館，煨多人氣文物可以睇。

(圖片來源) 

 

士林夜市與饒河街夜市：香港人最愛的台灣小吃體驗

台北夜市咁多，香港人最常去嘅就係士林同饒河街，兩個應該點揀？

• 士林夜市喺捷運劍潭站附近，範圍大，食嘢、買衫、玩遊戲都有，地下美食區仲集中咗好多熱食檔，想一次過試勻唔同小食就揀佢。

 

• 饒河街夜市喺捷運松山站出口，基本上係一條直路由頭行到尾，入口就係松山慈祐宮，行程趕或者唔想行到攰，饒河街會輕鬆好多。

 

香港人最常點嘅都係胡椒餅、蚵仔煎、大腸包小腸、雞排同珍珠奶茶。兩個夜市最逼都係夜晚 7 點至 9 點，想行得鬆動啲，可以揀平日 6 點前到，或者 9 點半後先去。

 

相關文章：台北夜市地圖攻略：捷運路線規劃＋7 大夜市特色懶人包

 

迪化街與赤峰街：老街新舊融合的香港人熱門去處

迪化街喺大稻埕一帶，係百年老街，兩邊都係舊式洋樓，南北貨、茶葉、中藥材同烏魚子一間接一間，想買傳統台灣手信就嚟呢度，順路仲可以去霞海城隍廟拜月老，係好多遊客必到嘅一站。

 

赤峰街喺捷運中山站同雙連站之間，以前係汽車零件同五金舖，依家夾住好多咖啡店同小店，新舊並存，好適合坐低飲杯嘢、慢慢行。簡單講，迪化街買手信，赤峰街就行街歎咖啡，兩條街相距唔遠，可以排喺同一日。

 

如果喺農曆新年前去台北，一定要去迪化街年貨大街。每年大約由農曆 12 月下旬開到除夕前，成條街擺滿糖果、乾貨同年貨，仲有得試食，氣氛同香港年宵有啲似，想去就要留意官方公布嘅確實日期。

每年農曆 12 月下旬開到除夕前，迪化街年貨大街就會成為台北好去虛。成條街擺滿糖果、乾貨同年貨，氣氛同年宵有啲似。

(圖片來源)  

 

陽明山：香港少見的近郊自然好去處

陽明山國家公園屬火山地形，香港好難見到，而且好多景點落車行一小段就到。小油坑喺停車場附近已經睇到不停冒白煙嘅噴氣孔；擎天崗有一大片草原，天氣好嘅時候行上去好開揚；竹子湖就以海芋田出名，影相一流。

 

交通方面，可以喺捷運劍潭站搭紅 5 公車到陽明山公車總站，再轉 108 遊園公車，沿途會停小油坑、擎天崗等景點，想喺邊度落車都得。陽明山花季大約每年 2 月至 3 月，主要睇櫻花、杜鵑同茶花，之後竹子湖海芋季同繡球花季會延續到 6 月左右。花況每年唔同，出發前最好喺陽明山國家公園管理處網站查最新消息，山上溫差大，記得帶件外套。

 

相關文章：一年四季都好玩的陽明山國家公園，遊玩攻略介紹

 

台北好去處的最後一站：留時間逛選物店

行完老街同夜市，好多香港人最後一日先發現手信未買齊，結果去到機場先匆匆忙忙亂揀。其實可以喺行程尾預留一兩個鐘，去間專做台灣選物嘅店慢慢睇，送屋企人、朋友同同事嘅都可以一次過搞掂。

 

來好（LAI HAO）就係以台灣選物為主嘅手信店，將唔同地方嘅台灣特色零食、茶同生活小物集中喺同一間，唔使為咗買齊手信走勻成個台北。門市喺永康街同西門町一帶，永康街可以順路配埋附近小食一齊行，西門町就方便排喺出發去機場前嗰晚，行完直接執行李返香港。

如果想買文青小物，來好絕對係台北好去處之一，，將唔同地方嘅台灣特色零食、茶同生活小物集中喺同一間，唔使為咗買齊手信走勻成個台北。

(圖片來源)  

 

台北好去處真係唔少，幾日時間未必可以全部去晒，所以與其行程排到密麻麻，不如先揀幾個自己最有興趣嘅地方，最重要係留返少少空間畀自己隨意行吓、食吓、買吓，旅行先唔會變成趕景點。