台北夜市咁多，到底應該去邊個最好？與其逐個逐個排名比較，不如直接跟捷運路線分區，同一條線嘅夜市可以順路一齊去，甚至一日排埋兩個行程，唔使成日搭車來回市區唔同角落，更方便安排時間。
台北有好多個夜市，較多人熟悉嘅有士林夜市、饒河夜市、寧夏夜市、師大夜市、臨江街夜市等，每個地方都有自己嘅特色。有啲主打台灣地道小食，有啲食物選擇特別多，亦有啲可以一邊食嘢、一邊行街買衫。下面逐個整理各大夜市嘅特色，再用捷運路線幫你分區，教你點樣安排先可以食得順、行得輕鬆。
台北夜市要去哪一個？
其實唔使睇排名清單揀，直接跟住捷運路線去分區仲方便！同一條線上嘅夜市，坐一程車就可以去埋其他景點，唔使成日搭車走返轉頭，慳返晒時間，例如日頭去台北 101，晚上可以順路去臨江街夜市；去龍山寺一帶，就可以接住行華西街夜市。行程安排得好，行少好多冤枉路。
以下就按照捷運路線整理 7 大台北夜市，先睇清楚位置、交通同適合時間，再決定去邊個，會比逐個夜市睇排名更加容易安排。
夜市名稱 | 捷運站與出口 | 步行時間 | 營業時間 | 推薦停留時段 |
士林夜市 | 劍潭站 1 號出口 | 約 3 - 5 分鐘 | 17:00–24:00 | 夜晚 7–9 點人流最旺 |
寧夏夜市 | 雙連站 1 號出口／中山站 5 號出口 | 約 10 分鐘 | 17:00–24:00 | 啱啱開檔嗰陣較好行 |
通化夜市 | 信義安和站 4 號出口 | 約 10 分鐘 | 18:00–24:00 | 行完 101 之後食夜宵最啱 |
饒河夜市 | 松山站 1、2 或 5 號出口 | 出閘即到 | 17:00–24:00 | 一入夜就好熱鬧 |
師大夜市 | 台電大樓站 3 號出口 | 約 5 - 8 分鐘 | 16:00–23:00 | 黃昏人流較少好行 |
華西街觀光夜市 | 龍山寺站 1 號出口 | 約 5 分鐘 | 17:00–24:00 | 夜晚 8 點後最有氣氛 |
南機場夜市 | 小南門站／龍山寺站 3 號出口 | 約 15 分鐘 | 17:00–24:00 | 平日夜晚少人排隊 |
貼士：夜市實際營業時間會因店家、星期及天氣有所變化，出發前可以再確認當日營業情況。
淡水信義線夜市：士林、寧夏、臨江街
淡水信義線串埋咗台北最出名嘅三個夜市，特別係第一次嚟台北嘅朋友，呢條線幾乎已經涵蓋晒「必食」同「必行」嘅核心體驗。
士林夜市：規模最大，好逛好買的入門首選
士林夜市係台北規模較大、亦相當多人認識嘅夜市，由劍潭站落車行過去唔算遠。食嘅、飲嘅、買衫、小物都有，選擇多到就算行成晚，都未必行得晒，第一次去台北想感受夜市氣氛，可以預留一晚慢慢行。
士林大香腸、雞排、大餅包小餅都係相當有代表性嘅台灣夜市小食。其中大餅包小餅係將酥脆嘅油條、花生糖粉等包入麵餅入面，一口咬落去又脆、又香。士林夜市另一個特色係地下美食街，入面有較多座位，對於行到攰、落雨或者想坐低慢慢食嘅旅客會方便好多。不過士林夜市遊客較多，熱門攤位可能要排隊，部分店舖價格亦可能比其他夜市高少少，建議可以先行一圈，再決定買邊幾款。
(圖片來源)
寧夏夜市：在地小吃聚落，巷弄感濃
寧夏夜市範圍冇咁大，但食店同攤位集中，唔需要行好耐，好適合淨係想專心食嘢、唔想逛街買嘢嘅朋友。夜市入面有唔少老字號小食，其中最出名嘅一定要數經營咗成 70 年嘅老字號「豬肝榮仔」，連續幾年攞米其林必比登推薦，招牌豬肝湯好清甜、豬肝嫩滑冇腥味；甜品就一定要試下「劉芋仔蛋黃芋餅」，芋泥包住鹹蛋黃同肉鬆，經常大排長龍。附近亦有住宅同舊街區，行落去冇大型觀光區咁熱鬧，反而多咗一份台北舊城區嘅生活感。
(圖片來源)
臨江街夜市（通化夜市）：離信義區最近的宵夜首選
如果日頭行程安排咗台北 101、信義商圈，晚上又想搵個地方食台灣小食，就可以選擇去臨江街夜市。位於信義區一帶，距離台北 101 唔算遠，唔需要特登搭車去另一區，行完商場、景點之後就可以接住食宵夜。想食得有台灣特色，可以留意胡椒餅、藥燉排骨、蚵仔煎同滷味。其中藥燉排骨係台灣夜市相當常見，用豬排骨加入中藥材燉煮，湯味濃郁，晚上飲返一碗暖暖嘅湯幾舒服。
松山新店線夜市：饒河、師大
饒河夜市：一條街走到底，動線最單純
由松山站行過去，入到夜市之後基本上沿住饒河街一路行，兩邊都有小食攤同店舖，好似一條好長嘅美食街，第一次去都唔會容易迷路。
講到饒河夜市，胡椒餅係相當有代表性嘅小食。外皮烤到金黃酥脆，入面包住豬肉、蔥同胡椒香味，啱啱出爐時熱辣辣，係好多旅客去饒河夜市都會搵嘅一款。除咗胡椒餅，藥燉排骨、蚵仔麵線、臭豆腐亦係夜市常見選擇，可以一路行一路揀。另一個好處係旁邊就係松山慈祐宮，可以先去廟宇附近行下，再由夜市入口開始一路食。
(圖片來源)
師大夜市：美食＋平價服飾，學生商圈氛圍
師大夜市因為鄰近台灣師範大學而得名，早期係學生同街坊嘅社區型商圈，後期因為小食出名，漸漸吸引到外地遊客。必食推薦「師園鹹酥雞」，蒜味鹹酥雞最出名，仲會送飲品任飲；經典嘅一定要試下「燈籠滷味」，開業超過 20 年，銅板價就食到一大盤；甜品就有「好好味港式菠蘿包」，冰火菠蘿油係人氣首選，好啱香港朋友口味。呢度除咗小食檔，仲聚埋唔少平價衫褲同飾物店，好啱鍾意邊食邊尋寶嘅朋友，氣氛都比一般觀光夜市更貼近台北後生仔嘅日常生活。
板南線 / 中和新蘆線夜市：華西街、南機場
位於萬華龍山寺附近，附近仲有龍山寺、艋舺老街區等歷史景點，所以可以將寺廟、老街同夜市安排喺同一晚。去到一定要食「郭家炒牛肉」，開業超過 80 年，用本地溫體牛加自製沙茶醬爆炒，被台灣網民封為「台北最好吃炒牛肉」；仲有「小王煮瓜」嘅黑金滷肉飯，連續 4 年攞米其林必比登推薦。呢度嘅攤商多數經營咗幾十年以上，係體驗老台北氣氛嘅代表地點之一。
南機場夜市：在地人推薦第一名，CP 值高
南機場夜市規模唔算大，遊客亦相對少，但物價親民、攤位密集，係唔少台北人心目中嘅口袋名單。必食推薦「曉迪筒仔米糕」，銷魂又多汁。因為遊客較少，呢度更能感受到台北人日常生活嘅樣貌，對於唔想淨係行觀光路線嘅朋友，值得特登繞過去嘅一站。
(圖片來源)
去台北夜市前必看的實用小提醒
1. 付款方式
台北夜市大部分攤商仍然以現金為主，行動支付（例如 LINE Pay、悠遊卡感應等）唔係每個攤位都用得，出發前準備定小額現金。小食單價通常唔高，準備多啲百幾蚊同 50 蚊紙鈔會方便啲，大鈔喺夜市攤位好易搵唔到散銀找。
2. 雨天備案
台北天氣變化比較快，尤其係梅雨季、颱風季或者冬天，行夜市遇到落雨並唔出奇。出發前睇一睇天氣預報，可以減少去到先發現成條街都濕晒嘅情況。士林夜市相對容易安排雨天行程，因為附近有地下美食街及較多有遮蔽嘅商場、店舖，可以將食嘢行程集中喺室內位置。不過夜市街區本身仍然有露天路段，遇上大雨都建議帶傘。饒河夜市同寧夏夜市亦有部分有遮棚路段，但主要仍然係街道型夜市，落細雨問題唔算太大，大雨就會比較影響行程。
食完夜市，下一站就係買手信。想帶返香港送畀屋企人、朋友，或者留返畀自己，可以去來好揀台灣伴手禮，唔需要臨走前先喺機場匆匆買，慢慢揀啱自己心水嘅台灣好物。
